يا شعبي ما توخرشى، ما إطيحشي...
يا شعبي... ما تأيّسشي...
أصمد وقاوم يا شعبي
واجه وقاوم يا شعبي...
ما تأيّسشي...
فكّر وقاوم يا شعبي
وما تنساشي لحياة...
لحمك حي وعرقك مرّ يا شعبي
دمّك نار وروحك حَر وحرية يا شعبي
ما تنساشي لحياة
فكّر وقاوم يا شعبي
حِب وقاوم يا شعبي
قاوم يا شعبي واستشهد كان خرجت من مخّك لحياة
كان خرجت من لحمك، من عظمك لحياة
حِب لحياة يا شعبي
حِب الحق وناضل
قاوم يا شعبي، قاوم لموت، قاوم لحياة
قاوم يا شعبي قاوم وحِب الحياة
يا شعبي... ما تأيّسشي...
لا سلطة ولا جاه ولا مال ولا سلاح
أكفر يا شعبي :
لا سلطة ولا جاه ولا مال ولا سلاح
قاوم يا شعبي
قاوم ربي معاك

يا شعبي... ما تأيّسشي...
ويني يا شعبي لحزاب، ويني الزاعامات
تعرّض صدورها للكرطوش
ويني النقابات
تحقق لمطالب، تروّح لمّك سالامات
يا شعبي...
ما تأيّسشي...

لا قتل ولا كرطوش
لا قمع ولا عتيقالات
لا قهر، لا سْجون ولا حبوسات
لا قبر، لا تعذيب ولا اغتيالات
لا فرجة، لا بيعان لا شريان لا موساوامات

يا شعبي...
ما تأيّسشي...

صحيح ناسك شاحت مدّم
الناس تحب على الكرامة
موش احتيفالات
الناس تمشي علعظم صحيح
علحديدة، وجه ربّي ما ثماش صحيح
صحيح الناس تمشي علعظم، علجزاز علحصحاص
حرام، حرام تموت الناس حرام

يا شعبي...
ما تأيّسشي...

حتى كان خلّوك، ما تْأيّسشي...
وينو المحامي، والقاضي والطبيب
وينو المعلم، وينو الاستاذ
والبطال وينو
والمهندس وينو...
والدجّال
وينو العامل والفلاح
وينو الموظف
والكوارجي
والبنكاجي وينو
ولّي لاعبها طيّارة، ولّي لاعبها فنان
ولّي لاعباها صحافي، ولّي لاعبها مِثقف
ولّي لاعبها الحمدِلّه ، ولّي لاعبها صَفَنْ
ولّي لاعبها صافُنْ، ولّي لاعبها بطل

يا شعبي...
ما تأيّسشي...

حتى كان كْلاوك
حتى كان كذبوا عليك
شخصيات... شخصيات
جرايد وراديونات
وتلافز وكلافز وانترنيت
شخصيات... شخصيات
شخصيات وبيرّة
شخصيات بالّبلابي، ولبلابي بالشخصيات
وسهريات عظلام وافلام ومسرحيات
وديانات وحوارات وثقافات
قمم وندوات ومهرجانات
مْعاليم ومجالس وبرلامانات
وطنية وْوطنيات
بيعات، خزعبلات وترّهات هات هات
بيعات ومناشدات
وينهم... وينهم هشخصيات
بلاتوهات، لغة منتحرة واستديوهات هات هات
يا شعبي لا تتحسّر شي ما مات، شي ما فات
لا توقف حياتك فلعشرينيات
ثمة الجربوعي وعلي وبشير
ثمة فرحات وفرحات وفرحات
ثمة محمد وحْسين
وثمة محمد بشير

يا شعبي...
ما تأيّسشي...

يا شعبي...
ما تأيّسشي...

صلاح الداودي